காலா, 2.0 என இரண்டு படங்களில் ரஜினி நடித்து வருகிறார். இதில் முதலில் வரப் போவது எந்த படம் என்பதுபற்றி இன்னும் உறுதியாகவில்லை. இந்நிலையில் இரண்டு படங்களின் புரமோஷன்களும் நடந்து வருகிறது. ஏற்கனவே காலா படத்தில் ரஜினி தோற்றத்தை நடிகர் தனுஷ் தனது இணைய தள டுவிட்டர் பக்கத்தில் வெளியிட்டிருந்தார். தற்போது காலா படத்தில் ரஜினியின் புதிய தோற்றத்தை வெளியிட்டிருக்கிறார். ரஞ்சித் இயக்கி வரும் இப்படத்தை தனுஷ், தனது வொண்டர்பார் நிறுவனம் மூலம் தயாரிக்கிறார்.

சந்தோஷ் நாராயணன் இசை. மும்பை, சென்னையில் படப்பிடிப்பு நடந்துள்ளது. ரஜினி ஜோடியாக பாலிவுட் நடிகை ஹுமா குரேஷி நடிக்கிறார். முக்கிய வேடத்தில் சமுத்திரக்கனி, அஞ்சலி பட்டீல், சுகன்யா, ஈஸ்வரிராவ் நடிக்கின்றனர். முன்னதாக சிறுவயது ரஜினி தோற்றத்தில் தனுஷ் நடிப்பார் என்று கூறப்பட்டது. ஆனால் அது வெறும் கிசுகிசு என்று தெரியவந்தது. ரஜினியின் பிறந்த நாளையொட்டி படத்தின் 2வது போஸ்டரை நள்ளிரவு வெளியிட இருப்பதாக தனுஷ் ஏற்கனவே அறிவித்திருந்தார். அதன்படி காலா படத்தின் 2வது போஸ்டரை நடிகர் தனுஷ் சரியாக 12 மணிக்கு டுவிட்டரில் வெளியிட்டார். ரஜினியின் பிறந்தநாளையொட்டி 2வது போஸ்டர் வெளியாகியுள்ளதால் அவரது ரசிகர்கள் பெரும் மகிழ்ச்சியில் உள்ளனர்.