எமது நாட்டுக்குள் சர்வதேச நாடுகளின் ஆய்வுக்கப்பல்கள் பிரவேசிப்பதற்கு விதிக்கப்பட்ட தடை எதிர்வரும் 31 ஆம் திகதி வரை நடைமுறையிலிருக்கும் எனத் தெரிவித்துள்ள வெளிவிவகார அமைச்சர் விஜித்த ஹேரத், ஆய்வுக்கப்பல் வருகையின்போது பின்பற்றப்படவேண்டிய நடைமுறைகள் குறித்து அறிக்கை சமர்ப்பிப்பதற்கு விசேட குழுவொன்றை நியமிக்கவிருப்பதாக அறிவித்துள்ளார்.

ஜனாதிபதி அநுரகுமார திஸாநாயக்கவின் அண்மைய இந்திய விஜயத்தின்போது ஆராயப்பட்ட விடயங்கள் மற்றும் கைச்சாத்திடப்பட்ட ஒப்பந்தங்கள் குறித்துத் தெளிவுபடுத்தும் நோக்கிலான ஊடகவியலாளர் சந்திப்பொன்று வெள்ளிக்கிழமை (20) கொழும்பிலுள்ள அரசாங்கத் தகவல் திணைக்களத்தில் ஏற்பாடு செய்யப்பட்டிருந்தது.

இதன்போது இலங்கைக்கு வருகைதரும் ஆய்வுக்கப்பல்கள் தொடர்பில் இந்தியாவினால் வெளிப்படுத்தப்பட்ட பிரத்யேக கரிசனைகள் என்னவென்று ஊடகவியலாளர் ஒருவரால் கேள்வி எழுப்பப்பட்டது.

அதற்குப் பதிலளித்த அமைச்சர் விஜித்த ஹேரத், இந்தியா அதன் ஆட்புல எல்லை சார்ந்தும், பிராந்தியப்பாதுகாப்பு சார்ந்தும் கரிசனைகளை வெளிப்படுத்தியதாகத் தெரிவித்தார்.

அதேவேளை தாமும் அந்த நிலைப்பாட்டில் உறுதியாக இருப்பதாகவும், ஆகையினாலேயே இந்தியாவின் தேசிய பாதுகாப்புக்கோ அல்லது பிராந்தியப்பாதுகாப்புக்கோ அச்சுறுத்தலை ஏற்படுத்தக்கூடிய செயற்பாடுகள் இலங்கையில் இடம்பெறுவதற்கு ஒருபோதும் இடமளிக்கப்போவதில்லை எனத் தாம் உத்தரவாதமளித்திருப்பதாகவும் குறிப்பிட்டார்.

அதேபோன்று இலங்கைக்கான ஆய்வுக்கப்பல் வருகை தொடர்பில் ஆராய்ந்து, அதன்போது கையாளப்படவேண்டிய நடைமுறைகள் தொடர்பில் அறிக்கை சமர்ப்பிப்பதற்காக பெரும்பாலும் இவ்வருட இறுதிக்குள் விசேட குழுவொன்றை நியமிக்கவிருப்பதாகவும், அக்குழுவினால் சமர்ப்பிக்கப்படும் அறிக்கையின் பிரகாரம் அடுத்தகட்ட நடவடிக்கைகள் எடுக்கப்படும் எனவும் அமைச்சர் தெளிவுபடுத்தினார்.

அதனையடுத்து ஆய்வுக்கப்பல்களின் வருகை தொடர்பில் பின்பற்றப்படவேண்டிய நடைமுறைகள் அடங்கிய வழிகாட்டலைத் தயாரிக்கவிருப்பதாகவும், அதுவரையில் நாட்டுக்குள் ஆய்வுக்கப்பல்கள் நுழைவதற்கு ஒருவருட கால தற்காலிகத்தடை விதிப்பதாகவும் கடந்த அரசாங்கத்தினால் விடுக்கப்பட்ட அறிவிப்பை மேற்கோள்காண்பித்த ஊடகவியலாளர், ஒருவருடம் நிறைவுறும் நிலையில், அந்த நடைமுறை வழிகாட்டலுக்கு என்ன நடந்தது? என அமைச்சரிடம் கேள்வி எழுப்பினார்.

அந்நடைமுறைகள் தொடர்பில் சில அறிக்கைகள், முன்மொழிவுகள் என்பன சமர்ப்பிக்கப்பட்டிருப்பதாகவும், இருப்பினும் தற்போதைய சூழ்நிலைக்கு அமைவாக அந்த நடைமுறைகளை மாற்றியமைக்க வேண்டியிருப்பதாகவும் அமைச்சர் பதிலளித்தார்.

அத்தோடு ஆய்வுக்கப்பல்கள் நாட்டுக்குள் பிரவேசிப்பதற்கு விதிக்கப்பட்ட தடை எதிர்வரும் 31 ஆம் திகதி வரை நடைமுறையில் இருக்கும் எனவும், அதன் பின்னர் அத்தடையை நீக்குவதா? இல்லையா? என்பது குறித்து புதிதாக நியமிக்கப்படும் குழுவின் அறிக்கைக்கு அமைவாகத் தீர்மானம் மேற்கொள்ளப்படும் எனவும் விஜித்த ஹேரத் தெரிவித்தார்.

ஐரோப்பிய நாடுகளுக்குச் செல்வதற்காக முகவர்கள் மூலம் அழைத்துச் செல்லப்பட்டு ரஷ்ய படையில் இணைந்து போர்க்களத்துக்கு அனுப்பப்பட்டுள்ள வடக்கு தமிழ் இளைஞர்கள் தங்களை இலங்கைக்கு அழைத்துச் செல்வதற்குரிய நடவடிக்கைகளை யாராவது முன்னெடுக்குமாறு பகிரங்கமான கோரிக்கையை மீண்டும் முன்வைத்துள்ளனர்.

சுதந்திர இலங்கையில் அனைத்து இனக்குழுமங்களும் ஏற்றுக்கொள்கின்ற அரசியல் யாப்பொன்று இன்னமும் உருவாக்கப்படவில்லை என்று சட்டத்தரணி லால் விஜயநாயக்க சுட்டிக்காட்டியுள்ளார்.

பயங்கரவாத தடைச்சட்டத்தை முற்றாக நீக்குதல், புதிய அரசியலமைப்பு உருவாக்கம் மற்றும் மாகாண சபைத் தேர்தல்களை நடாத்துதல் என்பவற்றுக்கான நடவடிக்கைகளை விரைந்து முன்னெடுப்பதில் அரசாங்கம் பின்வாங்குவது போல் தென்படுவதாக இலங்கை தமிழ் அரசு கட்சி உறுப்பினர்கள் நோர்வே நாட்டுத் தூதுவர் மே-எலின் ஸ்ரெனரிடம் சுட்டிக்காட்டியுள்ளனர்.

சீனக் கடற்படையின் மருத்துவ கப்பல் Ark Peace நேற்று கொழும்பு துறைமுகத்தை வந்தடைந்துள்ளது. இந்த கப்பல் இலங்கை மக்களுக்கு வைத்திய பரிசோதனை மற்றும் சிகிச்சை சேவைகளுக்காக டிசம்பர் 22 முதல் 27 வரை கொழும்பு துறைமுகத்தில் தங்கியிருக்கும் என்பது குறிப்பிடத்தக்கது.

அனைத்து மருத்துவர்களின் கட்டாய ஓய்வு வயதெல்லை 63 ஆக குறிப்பிட்டு அதி விசேட வர்த்தமானி அறிவித்தல் வெளியிடப்பட்டுள்ளது.

முன்னாள் ஜனாதிபதி ரணில் விக்கிரமசிங்க இன்று மீண்டும் இந்தியா செல்லவுள்ளார். இவ்வாண்டில் ஒரு மாத கால இடைவெளிக்குள் இரண்டாவது தனிப்பட்ட விஜயமாக நாளை அவர் டில்லி செல்லவுள்ளார். இந்த விஜயத்தின் போது பல்வேறு முக்கிய சந்திப்புக்களில் ஈடுபடவுள்ளார்.

புதிய அரசாங்கம் தனது ஆட்சியிலே இடம் பெறும் என குறிப்பிட்ட எந்த விடயங்களும் தற்போது முன்னெடுக்கப்படவில்லை என முன்னாள் பாராளுமன்ற உறுப்பினர் எம்.கே. சிவாஜிலிங்கம் தெரிவித்தார்.

இலங்கை தமிழரசுக் கட்சியின் பேச்சாளராக யாரும் நியமனம் செய்யப்படவில்லையென இலங்கை தமிழரசுக் கட்சியின் மட்டக்களப்பு மாவட்ட பாராளுமன்ற உறுப்பினரும் பாராளுமன்ற குழு பேச்சாளருமான ஞா.சிறிநேசன் தெரிவித்தார்.

நாடாளுமன்ற உறுப்பினர் செல்வம் அடைக்கலநாதன் மற்றும் பிரதமர் ஹரிணி அமரசூரிய ஆகியோருக்கிடையிலான சந்திப்பொன்று இடம்பெற்றுள்ளது. இந்த சந்திப்பு பிரதமரின் அலுவலகத்தில் இன்று சனிக்கிழமை இடம்பெற்றது.

பாராளுமன்றத் தேர்தல் தொடர்பான செலவின அறிக்கைகளை வழங்காத வேட்பாளர்களின் பெயர்களை பொலிஸாரிடம் வழங்க திட்டமிடப்பட்டுள்ளதாக தேர்தல் ஆணைக்குழு தெரிவித்துள்ளது.

கிளீன் ஸ்ரீலங்கா வேலைத்திட்டத்தை நடைமுறைப்படுத்துவதற்காக ஜனாதிபதி செயலணி உருவாக்கப்பட்டுள்ளமையை வரவேற்றுள்ள ஈ.பி.டி.பி. செயலாளர் நாயகம் டக்ளஸ் தேவானந்தா, இவ்வாறான செயலணிகளில் இலங்கையின் பல்லினத் தன்மை உறுதிப்படுத்தப்பட வேண்டியதன் அவசியத்தினயும் வலியறுத்தியுள்ளார்.

ஹட்டன் - கொழும்பு பிரதான வீதியில், இன்று பஸ் ஒன்று கவிழ்ந்து விபத்துக்குள்ளாகியுள்ளது. இந்த விபத்தில், மூவர் உயிரிழந்ததுடன், 27 பேர் படுகாயமடைந்துள்ளனர். படுகாயமடைந்தவர்கள் டிக்கோயா-கிளங்கன் வைத்தியசாலையில் அனுமதிக்கப்பட்டுள்ளதுடன், சிலர் கண்டி வைத்தியசாலைக்கு, மேலதிக சிகிச்சைகளுக்காக மாற்றப்பட்டுள்ளனர் என்று பொலிஸ் ஊடகப் பிரிவு தெரிவித்துள்ளது

யாழ் -செம்மணி பகுதியில் இறந்த நிலையில் முதலை ஒன்று காணப்பட்டுள்ளது. யாழ். வளைவுக்கு மிக அண்மையில் அமைந்துள்ள செம்மணி வீதியில் இன்று காலை முதலை ஒன்று உயிரிழந்த நிலையில் காணப்பட்டுள்ளது. முதலை அருகில் உள்ள நீர் வெளியேறும் பகுதியிலிருந்து வீதிக்கு வந்த போது வீதியில் பயணித்த வாகனத்தின் சில்லுக்குள் அகப்பட்டு உயிரிந்திருக்கலாம் என சந்தேகிக்கப்படுகிறது.

நாட்டில் சில பகுதிகளில் முட்டை விலை சடுதியாக குறைந்து வருவதாக முட்டை வியாபாரிகள் தெரிவிக்கின்றனர். முன்னர் 40 ரூபாய் தொடக்கம் 45 ரூபாய் வரையில் விற்பனை செய்யப்பட்ட முட்டை தற்போது 25 ரூபாய் தொடக்கம் 30 ரூபாய் வரையில் விற்பனை செய்யப்படுவதாக வியாபாரிகள் குறிப்பிடுகின்றனர்.

கடந்த காலங்களில், 15 முன்னாள் அமைச்சர்கள் இலங்கை விமானப்படையின் விமானங்களை பல்வேறு பயண மற்றும் போக்குவரத்து தேவைகளுக்காக பயன்படுத்தியதாக, இலங்கை விமானப்படை தலைமையகம் தெரிவித்துள்ளது.

பண்டிகைக் காலத்தை முன்னிட்டு கொழும்பு தாமரை கோபுரத்தை பார்வையிடுவதற்கான நேரத்தை நீடிக்கப்பட்ட தீர்மானிக்கப்பட்டுள்ளது. அதன்படி, தாமரை கோபுரம் டிசம்பர் 25 மற்றும் 26 ஆம் திகதிகளில் காலை 9 மணி முதல் நள்ளிரவு வரை பொதுமக்கள் பார்வைக்காக திறந்து வைக்கப்படும் எனவும் டிசம்பர் 27ம் திகதி காலை 9 மணி முதல் இரவு 11 மணி வரை செயல்படும்.மேலும், டிசம்பர் 31 மற்றும் ஜனவரி 1ஆம் திகதியன்று காலை 9 மணி முதல் ஜனவரி 2 ஆம் திகதி மதியம் 1 மணி வரை திறந்திருக்கும்.

எதிர்வரும் வருடம் சித்திரை தமிழ் சிங்கள புத்தாண்டிற்கு முன்னதாக உள்ளூராட்சி மன்றத் தேர்தல் நடாத்தப்படும் என ஜனாதிபதி அநுர குமார திசாநாயக்க தெரிவித்துள்ளார்.

மியன்மாரில் இருந்து இலங்கை கடற்பரப்புக்குள் வந்த 115 ரோகிங்யர்களை முல்லைத்தீவில் இருந்து திருகோணமலை அஷ்ரப் இறங்கு துறைக்கு வெள்ளிக்கிழமைகொண்டு செல்லப்பட்டு திருகோணமலை துறை முகப் பொலிசாரிடம் ஒப்படைக்கப்பட்டனர்.

யாழ்ப்பாணம், மண்கும்பான் பகுதியில் நேற்று இடம்பெற்ற வீதி விபத்தில் இளைஞர் ஒருவர் உயிரிழந்துள்ளார். மண்டைதீவு பகுதியைச் சேர்ந்த 21 வயதான அன்ரனி பிரான்சிஸ் நிலோஜன் என்பவரே உயிரிழந்துள்ளார்.

இந்தியாவுக்கும் இலங்கைக்குமான நோர்வே தூதுவரை H.E. May-Elin Stener, நேற்று சந்தித்து எமது மக்களின் பல முக்கிய விடயங்கள் மற்றும் சமகால அரசியல் தொடர்பாக தமிழரசுக் கட்சியின் பாராளுமன்ற உறுப்பினர் இரா. சாணக்கியனும் முன்னாள் பாராளுமன்ற உறுப்பினரும் ஜனாதிபதி சட்டத்தரணியுமான ம. சுமந்திரனுடன் சந்தித்து கலந்துரையாடினர்.