பருவகாலத்துக்கு ஏற்ப உடல்நிலையில் உண்டாகும் மாற்றங்களை தடுத்து ஆரோக்கியமாக வைத்திருக்க இயற்கையே நமக்கு உதவுகிறது. அந்த வகையில் கோடை வந்துவிட்டாலே உடலுக்கு குளுமைதரும் பொருள்களில் நுங்கு இன்றியமையாததாகிறது. பனைமரத்திலிருந்து பெறப்படும் பனைவெல்லம், பனங்கற்கண்டு பனங்கிழங்கு, பதநீர் வரிசையில் நுங்குவும் எண்ணற்ற மருத்துவகுணங்களை கொண்டிருக்ககூடியது. எல்லோரும் நுங்கு சாப்பிடும் போது அதன் தோலை நீக்கி உள்ளிருக்கும் சதை பகுதியை மட்டும் சாப்பிடுவோம்.

ஆனால் துவர்ப்பாக இருக்கும் நுங்கின் தோல்பகுதியில் தான் கால்சியம், பாஸ்பரஸ் , வைட்டமின் பி, சி போன்றவை அடங்கியிருக்கின்றன. இனி நுங்கை சாப்பிடும் போது தோலோடு சாப்பிட பழகுங்கள். கோடையில் மட்டுமே கிடைக்கும் நுங்கு கோடையால் உண்டாகும் உடல் பிரச்சனைகளை களைவதோடு அதை தீர்க்கவும் பயன்படுகிறது. இது குறித்து தெரிந்துகொள்வோம்.

அம்மை

கோடையில் வாட்டி வதைக்கும் அம்மை நோய்கள் வராமல் தடுக்க நுங்கு பயன்படுகிறது. உடலில் நோய் எதிர்ப்புசக்தி குறைவாக இருப்பவர்கள் எளிதில் சின்னம்மை, பெரியம்மை, தட்டம்மை போன்ற நோய்களுக்கு உள்ளாவார்கள். சீதோஷ்ண நிலையால் உடல் சூடாகி பித்தம் அதிகமாகி அதனோடு கபமும் சேர்ந்து கிருமித்தொற்று உண்டாவதன் மூலம் அம்மை வருகிறது. இவை 7 நாட்கள் முதல் 15 நாட்கள்வரை இருக்கும் என்றாலும் இந்த நாள்கள் உபாதையாக இருக்கும்.

இந்த நீர் கொப்புளங்கள் சுருங்க சுருங்க உடலில் அரிப்பை ஏற்படுத்தும், அரிப்பு தாங்காமல் சொரிந்து விடுவதால் அங்கு மீண்டும் அம்மை கொப்புளங்கள் உருவாகும். அம்மை கண்டவர்கள் தினமும் நுங்கை சாப்பிட்டு வருவதன் மூலம் உடல் குளிர்ச்சி அடையும். கொப்புளங்களின் மீது நுங்கு நீரை தடவி வருவதன் மூலம் கொப்புளங்கள் குளிர்ச்சியடைந்து அரிப்பை உண்டாக்காமல் இருக்கும். கோடை துவங்கும் போதே தினமும் நுங்கு சாப்பிட்டு வந்தால் அம்மை நோய் பெரும்பாலும் நெருங்காமல் செய்துவிடலாம்.

​தாகம் தணியும்

கோடையில் உடலில் எவ்வளவு நீர் இருந்தாலும் நீர் பற்றாக்குறை உண்டாகும். ஐஸ் வாட்டர், செயற்கை குளிர்பானங்கள் எல்லாமே தொண்டைக்கு இதமளித்தாலும் அவை ஆரோக்கியத்தை கெடுக்கவே செய்யும். இதை தாண்டி எவ்வளவு தண்ணீர் குடித்தாலும் தாகம் அடங்கவில்லை என்பவர்கள் நுங்கு சாப்பிட்டால் தாகம் தணியும். குறிப்பாக வெயிலில் செல்லும் போது சிலருக்கு அனல் காற்று உடலில் படும் போது உடலில் இருக்கும் நீர்ச்சத்து குறைந்து ரத்த ஓட்டத்தில் குறைபாடும் ஹீட் ஸ்ட்ரோக் போன்ற மயக்க நிலை உண்டாகும் வாய்ப்புண்டு. நுங்கில் சோடியம் மற்றும் பொட்டாசிய தாதுக்கள் உள்ளதால் இவை நீரிழிப்பு அபாயத்திலிருந்து காக்கிறது.

வெயிலின் வெப்பம் உடலை தாக்காமல் இருக்க வீட்டிலிருக்கும் போது வெளியே வந்த பிறகு நுங்கு சாப்பிட்டு வந்தால் தாகம் தணிவதோடு நீர்ச்சத்து இழப்பு அபாயமும் உண்டாகாது. உடல் வெப்பநிலையை சீராக வைத்திருக்கவும் உடலுக்கு ஆற்றலையும் வழங்குகிறது.

​மலச்சிக்கல்

உடலில் அதிகபடியாக வியர்வை வெளியேறுவதால் உடலில் வழக்கத்தை விட அதிகப்படியான நீர்ச்சத்து குறைபாடு உண்டாகும். அதை தவிர்க்கவே பழங்கள், நீர்ச்சத்து மிக்க காய்கறிகளை எடுத்துகொள்ள வேண்டும் என்று வலியுறுத்துகிறார்கள். ஆனால் சற்று காரமான உணவு வகைகளாலும், வயிற்றுபிரச்சனை, செரிமானக்கோளாறு, நீர்ச்சத்து குறைபாடாலும் மலச்சிக்கல் பிரச்சனையும் சந்திக்க நேரிடும். காலையில் வெறும் வயிற்றில் வெதுவெதுப்பான நீரை குடித்த பிறகு இரண்டு அல்லது மூன்று நுங்குகளை சாப்பிட்டு வந்தால் மலச்சிக்கல் காணாமல் போகும். குடல் இயக்கத்தை சீராக செயல்பட வைக்க நுங்கு உதவுகிறது.

​அல்சர் தீவிரம்

உண்வுக்குழாய், இரைப்பை, சிறுகுடலின் உட்சுவரில் உருவாகும் ஒரு வகை புண். அல்சரால் அவதிப்படுபவர்கள் கோடையில் உணவு முறையில் கவனமாக இல்லாவிட்டால் மேலும் அதிக வீரியத்துக்கு உள்ளாவார்கள். உணவு பழக்கம் மூலமே இதை பெரும்பாலும் குணப்படுத்தவும், கட்டுப்படுத்தவும் முடியும் என்பது குறிப்பிடத்தக்கது.

மிதமான கார உணவுகளும் கூட வெயில் காலங்களில் அதிகப்படியான உபாதையை உண்டாக்கும். தினமும் நுங்கு எடுத்துகொள்வதன் மூலம் அல்சர் தீவிரமாகாமல் கட்டுப்படுத்தமுடியும். வயிற்றுப்புண், குடல்புண் ஆறுவதற்கும் வாய்ப்புண்டு.கல்லீரலில் இருக்கும் நச்சை நீக்கி கல்லீரலையும் சுத்தம் செய்ய உதவுகிறது. குடலில் இருக்கும் கழிவுகளும் வெளியேற்றும். நெஞ்சு முதல் வயிறு வரை எரிச்சல் இருந்தாலும் நுங்கு இதமான குளுமை தரும்.

​கர்ப்பிணி பெண்

கருவுற்றிருக்கும் பெண்கள் கர்ப்பக்காலத்தின் போது கோடையை சந்தித்தால் தவிர்க்காமல் நுங்கு சேர்க்க வேண்டும். இதனால் கர்ப்பக்காலத்தில் செரிமானப்பிரச்சனை நீங்கும். வாந்தி மற்றும் குமட்டல் உணர்வும் உண்டாகாது. நெஞ்செரிச்சல், அஜீரணக்கோளாறுகள், மலச்சிக்கல் போன்ற வழக்கமான பிரச்சனைகளின் தீவிரம் கட்டுக்குள் இருக்கும்.

கர்ப்பக்கால ஒவ்வாமையை போக்கவும் ஹார்மோன் சுரப்புகள் சீராக இயங்கவும் அடிக்கடி அளவோடு நுங்கு சேர்த்து வருவது நல்லது. கர்ப்பக்காலத்தில் குளுமை கொடுக்குமோ என்று அஞ்ச வேண்டாம். அளவாக எடுத்துவருவதன் மூலம் நன்மையே கிடைக்கும்.

புற்றுநோய்

புற்றுநோயில் கருப்பை வாய் புற்றுநோய்க்கு அடுத்ததாக பெண்கள் மார்பக புற்றுநோய்க்கு தான் அதிகம் ஆளாகிறார்கள் என்கிறது ஆய்வு. மார்பக புற்றுநோய் வராமல் தடுக்க உதவும் ஆன் தோசயனின் என்னும் வேதிப்பொருள் நுங்கில் இருக்கிறது. இந்த ஆன் தோசயனின் என்னும் வேதிபொருளானது புற்றுநோய் செல்கள் மற்றும் அது உருவாக்கும் கட்டிகளின் வளர்ச்சியை தடுக்க உதவுகிறது. பெண்கள் நுங்கு கிடைக்கும் சீஸனில் அதிக அளவில் எடுத்துகொள்வதன் மூலம் சிறந்த பயனை அடையமுடியும். கூடுதலாக இவை இதய நோய்களையும் குறைக்கின்றன.

வியர்க்குரு

அதிகப்படியான வெப்பத்தால் சருமத்தில் வறட்சி, எரிச்சல், சரும வியாதி பொதுவாக பாதிப்புக்குள்ளாக்கும். குறிப்பாக கோடைக்காலத்தில் பிறந்த குழந்தை முதல் வயதானவர்கள் வரை அனைவரும் வியர்க்குரு பிரச்சனைக்கு உள்ளாவதுண்டு. நுங்கு சாப்பிடுவதோடு அவ்வபோது வியர்க்குருவின் மீது தடவி வந்தாலும் வியர்க்குரு மறையும். அதே போன்று வெயிலால் வரும் சூட்டு கொப்புளங்களும் கூட நுங்கு தடவி பூசுவதன் மூலம் எரிச்சல் இல்லாமல் சரியாகும். மீண்டும் இவை வரவும் செய்யாது.

​டயட்டில் இருப்பவர்கள்

அதிக எடை கொண்டிருப்பவர்கள் உடல் எடையை குறைக்க பலவிதமான டயட் மேற்கொள்வதுண்டு. அதை கோடைக்காலங்களிலும் கடைபிடிக்கும் போது உஷ்ணம் சம்பந்தமான பிரச்சனைகள் வரக்கூடும்.

இவர்கள் தினமும் 3 நுங்கை அரை டம்ளர் நீரில் ஊறவைத்து நன்றாக மசித்து வேண்டிய அளவு நீர் விட்டு குடித்துவரலாம். டயட் பிரச்சனையால் உடலுக்கு வரக்கூடிய உஷ்ணப்பிரச்சனைகள் வராமல் இருக்கும். அதோடு நுங்கில் இருக்கும் கனிமச்சத்தும், ஊட்டச்சத்தும் உடலில் குளுக்கோஸ் அளவை சீராக வைத்து உடலை சோர்வின்றி சுறுசுறுப்பாக வைத்திருக்கும். கொழுப்பை கட்டுப்படுத்தி உடல் எடையையும் குறைக்க உதவும். குறைந்த கலோரி கொண்டிருப்பதால் இவை நீண்ட நேரம் உங்கள் பசியை ஊக்குவிக்காது.

குறிப்பு நுங்கு மிக மிக நல்லது என்பதில் மாற்றுகருத்தில்லை. ஆனா வாங்கிய உடன் அல்லது நுங்கை பிரித்து எடுத்த சில மணி நேரங்களில் பயன்படுத்திவிட வேண்டும். அதை குளிர்சாதன பெட்டியில் வைத்து பயன்படுத்த கூடாது. அளவுக்கதிகமாக சாப்பிட்டாலும் வயிற்று வலியை உண்டாக்கும்.