Chia Seeds Water Benefits: சியா விதைகளை தண்ணீரில் அல்லது தேங்காய் நீரில் இரவு முழுவதும் ஊறவைத்து, காலையில் வெறும் வயிற்றில் குடிக்கும் பழக்கம் மிகவும் பிரபலமாகி வருகிறது. சிறியதாகத் தோன்றும் இந்த விதைகள், உடலுக்குத் தேவையான பல முக்கிய ஊட்டச்சத்துக்களை கொண்டுள்ளன. நார்ச்சத்து, ஒமேகா-3 கொழுப்பு அமிலங்கள், புரதம், கால்சியம், மக்னீசியம், இரும்புச்சத்து மற்றும் பல்வேறு ஆன்டிஆக்ஸிடன்ட்கள் நிறைந்த சியா விதைகள், உடலின் ஒட்டுமொத்த ஆரோக்கியத்தையும் மேம்படுத்த உதவுகின்றன.

இந்த எளிய பானத்தை தினசரி உணவுப் பழக்கத்தில் சேர்ப்பதன் மூலம் கிடைக்கும் முக்கிய நன்மைகள் குறித்து விரிவாகப் பார்ப்போம்.

1. உடல் எடையைக் குறைக்க உதவுகிறது - உடல் எடையைக் குறைக்க முயற்சி செய்பவர்களுக்கு சியா விதை தண்ணீர் ஒரு சிறந்த துணையாக இருக்கும். சியா விதைகளில் அதிக அளவு நார்ச்சத்து இருப்பதால், அவை தண்ணீரை உறிஞ்சி ஜெல்லி போன்ற அமைப்பாக மாறுகின்றன.

இதனால் வயிறு நீண்ட நேரம் நிறைந்திருப்பது போன்ற உணர்வு ஏற்படும். இதன் காரணமாக அடிக்கடி பசி எடுப்பது குறையும் தேவையற்ற சிற்றுண்டிகளைத் தவிர்க்க முடிவதால், தினசரி கலோரி உட்கொள்ளும் அளவும் குறையக்கூடும். இதனால் ஆரோக்கியமான முறையில் உடல் எடையைக் கட்டுப்படுத்த உதவியாக இருக்கும்.

2. இதய ஆரோக்கியத்தை பாதுகாக்கிறது -சியா விதைகள் ஒமேகா-3 கொழுப்பு அமிலங்களின் சிறந்த தாவர மூலமாகக் கருதப்படுகின்றன. இந்த அத்தியாவசிய கொழுப்பு அமிலங்களை உடலால் தானாக உருவாக்க முடியாது.எனவே, உணவின் மூலமாகவே அவற்றைப் பெற வேண்டியுள்ளது.

ஒமேகா-3 கொழுப்பு அமிலங்கள் உடலில் ஏற்படும் அழற்சியைக் குறைக்க உதவுகின்றன. நீண்டகால அழற்சி, இதய நோய் உள்ளிட்ட பல்வேறு நாள்பட்ட நோய்களுக்கு முக்கிய காரணிகளில் ஒன்றாகக் கருதப்படுகிறது.

மேலும், இவை டிரைகிளிசரைடு அளவைக் குறைக்கவும், இரத்த அழுத்தத்தைக் கட்டுப்படுத்தவும், இரத்த நாளங்களில் கொழுப்பு படிவதைத் தடுக்கவும் உதவக்கூடும். இதன் மூலம் கெட்ட கொலஸ்ட்ரால் அளவைக் கட்டுப்படுத்தி, மாரடைப்பு மற்றும் இதய நோய்களின் அபாயத்தைக் குறைக்க உதவுகிறது.

3. உடலை நீரேற்றமாக வைத்திருக்க உதவுகிறது - சியா விதைகளை சாதாரண தண்ணீரில் ஊறவைத்தும் பருகலாம். அதேபோல், தேங்காய் நீரில் ஊறவைத்து அருந்துவதும் சிறந்த தேர்வாகும். தேங்காய் நீரில் பொட்டாசியம், மக்னீசியம், சோடியம் போன்ற இயற்கை எலக்ட்ரோலைட்டுகள் அதிகளவில் உள்ளன.

இவை உடலின் திரவச் சமநிலையைப் பராமரிக்கவும், தசைகளின் இயல்பான செயல்பாட்டை ஆதரிக்கவும், உடலுக்கு புத்துணர்ச்சி அளிக்கவும் உதவுகின்றன. குறிப்பாக உடற்பயிற்சிக்குப் பிறகு அல்லது அதிக வெப்பமான காலநிலையில் உடலில் இழக்கும் நீர்ச்சத்தையும் தாதுக்களையும் மீண்டும் நிரப்ப இந்த கலவை பயனுள்ளதாக இருக்கும்.

4. இரத்தச் சர்க்கரை அளவைக் கட்டுப்படுத்த உதவுகிறது - சியா விதைகளில் உள்ள கரையக்கூடிய நார்ச்சத்து, உணவு செரிமானமாகும் வேகத்தை மெதுவாக்குகிறது. இதன் காரணமாக உணவுக்குப் பிறகு இரத்தத்தில் சர்க்கரை அளவு திடீரென அதிகரிப்பதை ஓரளவு கட்டுப்படுத்த உதவுகிறது.

இதனால் இன்சுலின் எதிர்ப்பு உள்ளவர்கள் அல்லது நீரிழிவு நோயாளிகள், மருத்துவர் அல்லது உணவியல் நிபுணரின் ஆலோசனையுடன் சியா விதைகளை உணவில் சேர்த்துக் கொள்ளலாம். இது இரத்தச் சர்க்கரை அளவை சீராக வைத்திருக்க உதவக்கூடும்.

குறிப்பு - இதனை தொடர்ச்சியாக பயன்படுத்தும் முன்னர் உரிய மருத்துவ ஆலோசனை பெற்றதன் பின்னர் பயன்படுத்துவதே நல்லது.