பொதுவாக எல்லா காலங்களிலும் கிடைக்கக்கூடிய பச்சை பட்டாணியில் கார்போஹைட்ரேட் அதிகமாக இருந்தாலும், கலோரிகள் குறைவாகவே உள்ளன. மேலும், நார்ச்சத்து, புரோட்டீன், விட்டமின் ஏ, கே, மாங்கனீஸ், இரும்புச்சத்து, போலேட், தயமின் போன்ற பல்வேறு ஊட்டச்சத்துக்கள் நிறைந்துள்ளன. இதில் அதிகளவு நார்ச்சத்து இருப்பதால், செரிமானத்தை மேம்படுத்தி குடல் ஆரோக்கியத்திற்கு உதவுவதுடன், மலச்சிக்கலையும் குறைக்கிறது.

குறைந்த கலோரிகள் மற்றும் அதிக நார்ச்சத்து காரணமாக உடல் எடையை குறைக்க விரும்புவோருக்கும் இது சிறந்த உணவாகும். மேலும், பச்சை பட்டாணியில் உள்ள நியாசின் மற்றும் ஆன்டிஆக்ஸிஜென்டுகள் இதய ஆரோக்கியத்தை மேம்படுத்தவும், இரத்தக் குழாய்களில் கொழுப்பு சேர்வதைத் தடுக்கவும் உதவுகின்றன.

இத்தனை ஆரோக்கிய நன்மைகள் கொண்ட பச்சை பட்டாணியை வைத்து, அனைவரும் விரும்பி சாப்பிடும் சுவையான கேரளா ஸ்டைல் பட்டாணி கிரேவி செய்வது எப்படி என்பதை இந்தப் பதிவில் பார்க்கலாம்.

தேவையான பொருட்கள்

2 கப் பச்சை பட்டாணி

2 பெரிய வெங்காயம், நறுக்கியது

2 தக்காளி, நறுக்கியது

2 பல் பூண்டு

1 இன்ச் இஞ்சி

2 ஸ்பூன் மல்லி விதைகள்

5 வர மிளகாய்

1 கப் தேங்காய்ப்பால்

3 ஸ்பூன் தேங்காய் எண்ணெய்

தேவையான அளவு உப்பு

தேவையான அளவு தண்ணீர்

சிறிதளவு கொத்தமல்லி இலை, நறுக்கியது

செய்முறை

முதலில் பட்டாணியை இரவு முழுவதும் தண்ணீரில் ஊறவைத்து, மறுநாள் நன்றாக வேகவைத்து வைத்துக் கொள்ளவும். பின்னர் ஒரு பாத்திரத்தை அடுப்பில் வைத்து சூடாக்கி, அதில் மல்லி விதைகள் மற்றும் வர மிளகாயைச் சேர்த்து நல்ல மணம் வரும் வரை வறுக்கவும். பின்னர் அதை ஆறவைத்து, பொடியாக அரைத்து வைத்துக் கொள்ளவும்.

அதே பாத்திரத்தில் 1 ஸ்பூன் தேங்காய் எண்ணெய் ஊற்றி, நறுக்கிய வெங்காயத்தைச் சேர்த்து பொன்னிறமாகும் வரை வதக்கவும்.

பிறகு நறுக்கிய தக்காளி, இஞ்சி மற்றும் பூண்டு சேர்த்து, தக்காளி நன்றாக குழையும் வரை வதக்கவும்.இந்தக் கலவையை ஆறவைத்து, மிக்ஸியில் போட்டு மென்மையான விழுதாக அரைத்துக் கொள்ளவும்.

இப்போது அதே கடாயில் மீதமுள்ள 2 ஸ்பூன் தேங்காய் எண்ணெயை ஊற்றி, அரைத்து வைத்துள்ள மசாலா விழுதைச் சேர்க்கவும்.மசாலா நன்றாக வதங்கியதும், முன்பு அரைத்து வைத்துள்ள மல்லி விதை–வர மிளகாய் பொடியைச் சேர்க்கவும்.

மசாலாவிலிருந்து நல்ல மணம் வரும் வரை சுமார் 5 நிமிடங்கள் மிதமான தீயில் வதக்கவும். பின்னர் வேகவைத்த பட்டாணி, தேவையான அளவு உப்பு மற்றும் சுமார் 1 கப் தண்ணீர் சேர்த்து நன்றாகக் கலந்து, பட்டாணி மென்மையாகும் வரை கொதிக்கவிடவும்.

பட்டாணி நன்றாக வெந்ததும் தேங்காய்ப்பாலைச் சேர்க்கவும். தேங்காய்ப்பால் சேர்த்த பிறகு தீயைக் குறைத்து, குழம்பை மெதுவாகக் கொதிக்கவிடவும்.

அதிகமாகக் கொதிக்கவிடாமல், தேவையான பதம் வந்ததும் அடுப்பை அணைக்கவும். இறுதியாக நறுக்கிய கொத்தமல்லி இலையைத் தூவி இறக்கினால், அவ்வளவு தான் சுவையான கேரளா ஸ்டைல் பட்டாணி மசாலா தயார். சாதம், சப்பாத்தி, அப்பம் அல்லது பரோட்டாவுக்கு இந்த ரெசிபி பக்காவாக பொருந்தும்.