உடல் ஆரோக்கியத்தை மேம்படுத்துவதற்காக நம் முன்னோர்கள் பின்பற்றிய பல இயற்கையான உணவுப் பழக்கங்கள் இன்றும் மக்களிடையே பிரபலமாக உள்ளன. காலையில் எலுமிச்சை கலந்த நீர் குடிப்பது, வெந்தயத்தை இரவு முழுவதும் ஊற வைத்து காலையில் உட்கொள்வது போன்ற பழக்கங்கள் உடல் ஆரோக்கியத்தை மேம்படுத்துவதற்காக தொன்று தொட்டு பின்பற்றப்பட்டு வரும் பழக்கங்களாக உள்ளன. அந்த வரிசையில், காலையில் எழுந்ததும் வெறும் வயிற்றில் கிராம்பை மென்று சாப்பிடும் பழக்கமும் பலரால் பின்பற்றப்பட்டு வருகிறது. உணவுக்கு மணமும் தனித்துவமான சுவையும் சேர்க்கும் கிராம்பு, பாரம்பரியமாக பல்வேறு உடல்நலப் பயன்பாடுகளுக்காகவும் பயன்படுத்தப்பட்டு வருகிறது.

குறிப்பாக, கிராம்பை மென்று சாப்பிடுவதால் உடலுக்கு கிடைக்கும் அற்புதமான ஆரோக்கிய நன்மைகள் குறித்து இந்த பதிவில் விரிவாக பார்க்கலாம்.

1. வாய் ஆரோக்கியம் மேம்படும்

கிராம்பை வாயில் போட்டு மென்று சாப்பிடுவதால் கிடைக்கும் முக்கிய நன்மைகளில் ஒன்று, வாய் புத்துணர்ச்சியாகவும் துர்நாற்றமின்றியும் இருப்பது. இதில் உள்ள யூஜெனோல் பாக்டீரியா எதிர்ப்பு பண்புகளைக் கொண்டுள்ளது. இது வாய் துர்நாற்றத்துக்குக் காரணமான கிருமிகளை எதிர்த்துப் போராடுவதுடன், ஈறு தொற்றுகளையும் குறைக்க உதவும்.

2. செரிமானம் மேம்படும்

பல நூற்றாண்டுகளாக செரிமானப் பிரச்சனைகளைப் போக்க கிராம்பு பாரம்பரிய மருத்துவத்தில் பயன்படுத்தப்பட்டு வருகிறது. கிராம்பில் உள்ள மருத்துவப் பண்புகள் செரிமான நொதிகளின் செயல்பாட்டைத் தூண்டி, நாம் உண்ணும் உணவைச் சிறப்பாகச் செரிக்க துணைப்புரியும்.

குறிப்பாக, இதில் உள்ள யூஜெனோல் வயிற்றுப் புறணியைப் பாதுகாக்கவும், இரைப்பைப் புண்களின் அபாயத்தைக் குறைக்கவும் உதவக்கூடும் என்று விலங்குகளை வைத்து மேற்கொள்ளப்பட்ட ஆய்வுகள் தெரிவிக்கின்றன.

இதை உறுதிப்படுத்த மனிதர்களிடம் மேலும் ஆய்வுகள் தேவைப்பட்டாலும், சீரான உணவின் ஒரு பகுதியாக கிராம்பைச் சேர்ப்பது செரிமான ஆரோக்கியத்திற்கு உதவக்கூடும்.

3. ஆன்டி-ஆக்ஸிடன்ட்டுகள் அதிகம் நிறைந்தது

மசாலாப் பொருட்களில் வலுவான ஆன்டி-ஆக்ஸிடன்ட்டுகள் அதிகம் நிறைந்தது என்றால், அதில் கிராம்பும் முக்கியமான ஒன்று. இதில் உள்ள யூஜெனோல் போன்ற ஆன்டி-ஆக்ஸிடன்ட்டுகள், உடலில் ஏற்படும் ஆக்ஸிடேட்டிவ் அழுத்தத்துக்குக் காரணமான தீங்கு விளைவிக்கும் ஃப்ரீ ரேடிக்கல்களை நடுநிலையாக்க உதவுகின்றன.

இந்த ஃப்ரீ ரேடிக்கல்கள் உடலில் ஏற்படும் வீக்கம், இதய நோய், நீரிழிவு உள்ளிட்ட நாட்பட்ட நோய்களுக்கு பங்களிக்கக்கூடும். எனவே, வலுவான ஆன்டி-ஆக்ஸிடன்ட்டுகள் நிறைந்த கிராம்பை தினமும் 1–2 மென்று சாப்பிடுவது உடலில் உடனடியாக பெரிய மாற்றங்களை ஏற்படுத்தாவிட்டாலும், தொடர்ந்து எடுத்துக்கொள்ளும்போது நீண்ட கால ஆரோக்கியத்தை ஆதரிக்கக்கூடும்.

4. இரத்த சர்க்கரை அளவைக் கட்டுப்படுத்த உதவும்

கிராம்பு இரத்த சர்க்கரை அளவைச் சீராக வைத்துக்கொள்ள உதவக்கூடும் என்று சில ஆய்வுகள் தெரிவிக்கின்றன. மேலும், சிறிய அளவிலான மனித ஆய்வுகள் மற்றும் விலங்கு ஆய்வுகளில், கிராம்பில் உள்ள சில சேர்மங்கள் இன்சுலின் உணர்திறனை மேம்படுத்தி, உணவுக்குப் பிறகு ஏற்படும் இரத்த சர்க்கரை அதிகரிப்பைக் குறைக்கக்கூடும் என்று தெரியவந்துள்ளது.

இருப்பினும், கிராம்பை ஒருபோதும் சர்க்கரை நோய்க்கான மருந்துகளுக்கு மாற்றாகக் கருதக்கூடாது. சர்க்கரை நோய் உள்ளவர்கள் தினமும் கிராம்பை எடுத்துக்கொள்ளத் தொடங்குவதற்கு முன்பு மருத்துவரிடம் ஆலோசனை பெறுவது சிறப்பு.

5.அழற்சியை எதிர்த்துப் போராட உதவும்

நாள்பட்ட அழற்சி ஆர்த்ரிடிஸ், இதய நோய் மற்றும் வளர்சிதை மாற்றக் கோளாறுகளுடன் தொடர்புடையது. கிராம்பில் உள்ள யூஜெனோல் அழற்சி எதிர்ப்பு பண்புகளைக் கொண்டுள்ளது.

உணவின் ஒரு பகுதியாக கிராம்பைச் சேர்ப்பது ஆரோக்கிய நன்மைகளை கொடுக்கும் என்றாலும் ஏற்கனவே வேறு நோய்களுக்கு மருத்து பாவித்து வருபவர்கள் தினசரி கராம்பு எடுத்து கொள்ளும் முன்னர் மருத்துவரிடம் ஆலோசித்து பயன்படுத்துவதே சிறந்தது.