கதகளி திரைப்படத்தில் மருத்துவர், வண்ணார், அருந்ததியர் ஆகிய சாதிகளை இழிவுப்படுத்தும் வகையில் உள்ள காட்சிகளை நீக்காவிட்டால், அந்தத் திரைப்படத்தின் இயக்குநர் மீது சட்டப்பூர்வமான நடவடிக்கை மேற்கொள்ள முடிவு செய்யப்பட்டுள்ளதாக முடிதிருத்துவோர் சங்கம் தெரிவித்துள்ளது. ஒருங்கிணைந்த தஞ்சை மாவட்டத்தின் (தஞ்சாவூர், திருவாரூர், நாகை) முடிதிருத்தும் தொழிலாளர் சங்க அவசரக் கூட்டம் நீடாமங்கலத்தில் செவ்வாய்க்கிழமை நடைபெற்றது.

கூட்டத்துக்கு ஒருங்கிணைந்த தஞ்சை மாவட்டத் தலைவர் பெல்மாறன் தலைமை வகித்தார். கூட்டத்தில் சங்க சட்ட ஆலோசகர் வழக்குரைஞர் சோம. செந்தமிழ்ச்செல்வன் சிறப்புரையாற்றினார். பொங்கல் பண்டிகையையொட்டி, வெளிவந்த கதகளி திரைப்படத்தில் மருத்துவர், வண்ணார், அருந்ததியர் ஆகிய சாதிகளை திரைப்படத்தின் வில்லன் இழிவாகப் பேசும் காட்சி இடம் பெற்றுள்ளன. அந்தக் காட்சியை உடனடியாக நீக்காவிட்டால் அந்தப் படத்தின் இயக்குநர் பாண்டிராஜ் வீட்டின் முன்பும், தணிக்கைக் குழுவினரைக் கண்டித்தும் போராட்டம் நடத்துவதுடன் சங்கத்தின் சட்ட ஆலோசகரைக் கொண்டு உயர் நீதிமன்றத்தில் வழக்கு தொடுக்கப்படும் எனத் தீர்மானம் நிறைவேற்றப்பட்டது. மேலும், தமிழக சென்சார் போர்டு சாதிப் பிரச்னையை தூண்டுவதற்கு இந்தக் கூட்டத்தின் வாயிலாக கண்டனம் தெரிவிக்கப்பட்டது.