நத்தார் தாத்தா போன்று வேடமணிந்த நபர் ஒருவர் துப்பாக்கி முனையில் நகைக்கடையொன்றில் கொள்ளையடித்த சம்பவம் கனடாவில் இடம்பெற்றுள்ளது. கடந்த நத்தார் தினத்துக்கு முதல்நாள் கனடாவின் அல்பேர்ட்டா நகரிலுள்ள நகைக்கடையொன்றுக்கு முழுமையான நத்தார் தாத்தா வேடமணிந்த நிலையில் நபர் ஒருவர் வந்தார். ஆனால், அவர் பரிசுப் பொருட்கள் எதையும் கொடுக்கவில்லை. மாறாக, துப்பாக்கியொன்றைக் காட்டி ஊழியர்களை அச்சுறுத்திய அவர், அங்கிருந்த பெறுமதியான தங்க நகைகள் மற்றும் இரத்தினக்கற்கள் சிலவற்றை எடுத்துக் கொண்டு தப்பிச் சென்றுள்ளதாக பொலிஸார் தெரிவித்துள்ளனர். இவர் ஹம்மர் ரக வாகனமொன்றின் மூலம் தப்பிச் சென்றதாக தெரிவிக்கப்படுகிறது.

கடந்த 28 ஆம் திகதி 2015 Hummer H2 ரக வாகனமொன்று கைவிடப்பட்ட நிலையில் கண்டுபிடிக்கப்பட்டது. கொள்ளைடியத்த நபர் சிறிது தூரம் சென்ற பின், இவ்வாகனத்தை கைவிட்டுவிட்டு பிக்அப் வாகனமொன்றில் தப்பிச்சென்றமை கண்காணிப்பு கெமராக்கள் மூலம் கண்டறியப்பட்டுள்ளதாக தெரிவிக்கப்படுகிறது.