கர்நாடக மாநிலம் பெங்களூரில் உள்ள தனியார் பள்ளியில் நுழைந்த சிறுத்தை ஒன்று 2 பேரை கடித்து குதறியது. இதனால் அந்த பகுதியில் பரபரப்பு ஏற்பட்டுள்ளது. கர்நாடக மாநிலம் பெங்களூரு வர்த்தூர் போலீஸ் எல்லைக்கு உட்பட்ட பகுதியில் தனியாருக்கு சொந்தமான பள்ளிக்கூடம் உள்ளது. பள்ளி வளாகத்தில் ஒரு சிறுத்தை நடமாடுவதை காவலாளி பார்த்து அதிர்ச்சி அடைந்தார். இதுபற்றி அவர், பள்ளி நிர்வாகிகளுக்கு தகவல் கொடுத்தார். உடனே நிர்வாகிகள் அங்கு விரைந்து வந்தனர். அவர்கள் பள்ளியில் உள்ள கண்காணிப்பு கேமராவை ஆய்வு செய்தார்கள். அப்போது அதிகாலை நேரத்தில் ஒரு சிறுத்தை பள்ளிக்குள் புகுந்த காட்சிகள் பதிவாகி இருந்தன.

அதைத்தொடர்ந்து, போலீசாருக்கும், வனத்துறை அதிகாரிகளுக்கும் தகவல் தெரிவிக்கப்பட்டது. உடனே போலீசாரும், வனத்துறையினரும் அங்கு விரைந்து வந்து பள்ளிக்குள் புகுந்த சிறுத்தையை பிடிக்க நடவடிக்கை மேற்கொண்டனர். இதையடுத்து, பள்ளிக்குள் இருந்து சிறுத்தையை வெளியே கொண்டுவர பட்டாசுகள் வெடித்தனர். மேலும் அதை பிடிக்க வலைகளுடனும் வனத்துறையினர் காத்திருந்தார்கள். இந்த நிலையில், பள்ளிக்குள் இருந்து வெளியே வந்த சிறுத்தை அங்கு வைக்கப்பட்டு இருந்த இரும்பு வேலிக்குள் சென்றது. உடனே சிறுத்தையை பிடிக்க வனத்துறையினர் முயன்றனர்.

மேலும் புகைப்பட கலைஞர் ஒருவர் சிறுத்தையை படம் பிடிக்க முயன்றார். அப்போது ஆக்ரோஷம் அடைந்த அந்த சிறுத்தை வனத்துறையினர், புகைப்பட கலைஞரை தாக்கி கடித்து குதறியது. அந்த சிறுத்தையிடம் இருந்து தப்பிக்க 2 பேரும் சிறிது நேரம் போராடினார்கள். பின்னர் அதிர்ஷ்டவசமாக அவர்கள் சிறுத்தையின் பிடியில் இருந்து தப்பினார்கள். சிறுத்தையை பிடிக்க வனத்துறையினர் தொடர்ந்து போராடி வருகின்றனர் பெங்களூருவில் தனியார் பள்ளிக்குள் சிறுத்தை புகுந்த சம்பவமும், அந்த சிறுத்தை தாக்கி 2 பேர் படுகாயம் அடைந்த சம்பவமும் பெரும் பரபரப்பை ஏற்படுத்தி உள்ளது.