பிரேஸிலிலுள்ள மயானமொன்றில் உயிருடன் புதைக்கப்பட்ட நபர் ஒருவர் மீட்கப்பட்ட சம்பவம் அண்மையில் இடம்பெற்றுள்ளது. இந் நபர் புதைக்கப்பட்ட இடத்துக்கு அருகில் நடைபெற்ற மற்றொருவரின் இறுதிச் சடங்குகளில் கலந்துகொண்ட மக்கள், கல்லறையில் இரத்தக்கறையை கண்டதையடுத்து சந்தேகம் கொண்டனர். இது தொடர்பாக அதிகாரிகளுக்கு தகவல் தெரிவிக்கப்பட்டதையடுத்து, பொலிஸாரும் தீயணைப்புப் படையினரும் அங்கு வந்தனர். அவர்கள் மேற்படி கல்லறையை திறந்து, சவப்பெட்டியை திறந்து பார்த்தபோது அதற்குள் உயிருள்ள ஆண் ஒருவர் இருப்பதை அறிந்து பெரும் அதிர்ச்சியடைந்தனர். ரியோ டி ஜெனைய்ரோ நகரிலிருந்து 280 கிலோமீற்றர் தூரத்திலுள்ள கம்போஸ் டொஸ் கோய்டெகாஸெஸ் எனும் நகரிலுள்ள மயானமொன்றிலேயே மேற்படி நபர் புதைக்கப்பட்டிருந்தார்.

அவரை யாரேனும் கடுமையாக தாக்கி, புதைத்துவிட்டுச் சென்றிருக்கலாம் என சந்தேகிக்கப்படுகிறது. அந் நபர் உடனடியாக வைத்தியசாலையில் அனுமதிக்கப்பட்டார். தற்போது அவரின் உடலநிலை சீராக உள்ளதாகத் தெரிவிக்கப்படுகிறது. மேற்படி நபர் 33 வயதானவர் எனவும் உள்ளூரைச் சேர்ந்தவர் எனவும் அதிகாரிகள் தெரிவித்துள்ளனர். இவ் விடயம் தொடர்பாக பொலிஸார் விசாரணை நடத்தி வருகின்றனர்.