ஆட்கடத்தலில் ஈடுபட்டதாக குற்றம் சுமத்தப்பட்டிருந்த இலங்கையர் ஒருவருக்கு இந்தோனேசிய நீதிமன்றம் ஐந்தரை ஆண்டு கால சிறை தண்டனை விதித்துள்ளது. கடந்த வருடம் இலங்கையர்கள் உள்ளிட்ட 65 அகதிகளை நியுசிலாந்து நோக்கி படகு மூலம் அழைத்துச் செல்ல அவர் சூத்திரதாரியாக செயற்பட்டதாக குற்றம் சுமத்தப்பட்டிருந்தது. இந்த படகினை அவுஸ்திரேலிய அதிகாரிகள் வழிமறித்து, அதன் மாலுமிகளுக்கு கையூட்டல் வழங்கி மீண்டும் இந்தோனேசியாவுக்கே திருப்பி அனுப்பி இருந்தனர். இந்த நிலையில் கடந்த வருடம் ஜுலை மாதம் இந்த ஆட்கடத்தலை புரிந்தமைக்காக, குகண் என்று அழைக்கப்படும் விஷ்வநாதன் தினேஷ்குமார் கைது செய்யப்பட்டிருந்தார். அவர் மீதான குற்றச்சாட்டு நிரூபிக்கப்பட்ட நிலையில், அவருக்கு இந்தோநேசியாவின் ரோட் நாடோ மாவட்ட நீதிமன்றம் ஐந்தரை ஆண்டு கால சிறை தண்டனை வித்துள்ளது.