தனது காதலி வேறு ஒருவரை திருமணம் செய்து சென்றதால் வேதனை அடைந்த வாலிபர் காதலியின் வீட்டு முன்னாலேயே தற்கொலை செய்து கொண்ட சம்பவம் இந்தியாவின் புனேவில் இடம்பெற்றுள்ளது. புனே ஹடப்சர் சாதவ்வாடி அருகே சாலையோரம் நின்று கொண்டிருந்த கார் ஒன்று திடீரென தீப்பிடித்து எரிந்தது. இது குறித்து தகவல் அறிந்ததும் சம்பவ இடத்துக்கு விரைந்து வந்த தீயணைப்பு படையினர் காரில் பற்றிய தீயை அணைத்தனர். பின்னர் காரின் கதவை திறந்து பார்த்த தீயணைப்பு படை வீரர்கள் அதிர்ச்சி அடைந்தனர். அந்த காருக்குள் உடல் கருகிய நிலையில் நபர் ஒருவர் பிணமாக கிடந்தார்.

இதுபற்றி தகவல் அறிந்ததும் பொலிஸார் சம்பவ இடத்திற்கு விரைந்து சென்று கருகிய உடலை மீட்டு பிரேத பரிசோதனைக்கு அனுப்பி வைத்தனர். மேலும் அந்த நபர் யார் என்பது குறித்து விசாரணை நடத்தினர். இதில், திடுக்கிடும் தகவல்கள் தெரியவந்தது. அதன் விவரம் வருமாறு:- காரில் உடல் கருகி பிணமாக மீட்கப்பட்டவர் சதாரா மாவட்டத்தை சேர்ந்த அஜித் இங்கலே (வயது25) என்பது தெரியவந்தது.

இவரும் சதாரா பகுதியை சேர்ந்த இளம்பெண் ஒருவரும் காதலித்து வந்துள்ளனர். இவர்களது காதல் விவகாரம் சமீபத்தில் இளம்பெண்ணின் பெற்றோருக்கு தெரியவந்தது. இதனால் அவர்கள் தனது மகளுக்கு அவசர அவசரமாக புனே ஹடப்சர் பகுதியை சேர்ந்த ஒருவரை கடந்த மாதம் திருமணம் செய்து வைத்தனர். இதனையடுத்து அந்த பெண் தனது கணவருடன் சென்று வசித்து வந்தார். இதனை அறிந்ததும் அஜித் இங்கலே மனமுடைந்து காணப்பட்டு வந்துள்ளார். இந்தநிலையில் நேற்று முன்தினம் அஜித் இங்கலே தனது சொந்த ஊரில் இருந்து கார் மூலம் தனது முன்னாள் காதலி வசித்து வரும் புனே ஹடப்சர் சாதவ்வாடிக்கு வந்தார். அங்கு தனது முன்னாள் காதலியின் வீட்டின் முன்பு உள்ள சாலையில் காரை நிறுத்தினார்.

பின்னர் காரில் இருந்தபடியே முன்னாள் காதலியை கைப்பேசியில் தொடர்புகொண்டு தான் தீக்குளித்து தற்கொலை செய்து கொள்ளப்போவதாக கூறினார். உடனே தான் தயாராக வாங்கி வைத்திருந்த பெட்ரோலை எடுத்து தனது உடலில் ஊற்றி காருக்குள்ளேயே தீக்குளித்து தற்கொலை செய்துகொண்டது பொலிஸ் விசாரணையில் தெரியவந்தது. இந்த சம்பவம் அப்பகுதியில் பரபரப்பை ஏற்படுத்தியுள்ளது