அமெரிக்காவில் பிள்ளையில்லா ஏக்கத்தால் கர்ப்பிணியின் வயிற்றை கிழித்து சிசுவை கொன்ற பெண்ணுக்கு 100 ஆண்டு சிறை தண்டனை விதிக்கப்பட்டுள்ளது.அமெரிக்காவின் கொலாராடோ மாநிலத்தில் உள்ள பவுல்டர் கவுண்ட்டியை சேர்ந்தவர் மிச்சேல் வில்கின்ஸ்(28). ஏழுமாத கர்ப்பிணியாக இருந்த இவர் தனது ஆசைமகள் பிறப்பதற்கு முன்னரே ஆவ்ரா என்ற பெயரும்சூட்டி, குழந்தையின் வரவுக்காக காத்திருந்தார். பேறுகால பெண்களுக்கு தேவையான உடைகளையும், பிறக்கப்போகும் குழந்தைக்கும் புதிய ஆடைகளையும் தருவதாக இணையதளம் மூலம் கிடைத்த தகவலை அறிந்த மிச்சேல், கடந்த ஆண்டு மார்ச் மாதம் அந்த முகவரியை தேடி சென்றார். அங்கு அவரை டய்னல் லேன்(35) என்ற பெண் அன்புடன் வரவேற்றார். குளிர்பானம் கொடுத்து, உபசரித்து, தனிமையில் வாடும் தனது நிலையைப் பற்றி மணிக்கணக்கில் கதையளந்த டய்னல், தனது வீட்டில் இருந்த பழைய பொருட்களை போட்டுவைக்கும் பாதாள அறைக்கு மிச்சேலை அழைத்துச் சென்றார்.அங்கு கிடந்த மேஜை விளக்கால் மிச்சேலை கொலைவெறியுடன் தாக்கிய டய்னல், அவரது கழுத்தை நெறித்து மூர்ச்சை அடைய வைத்தார். பின்னர், நீளமான கத்தியை எடுத்து மிச்சேலின் அடிவயிற்றுப் பகுதியை வெட்டினார்.

வயிற்றின் உள்பகுதியில் கருப்பைக்குள் உயிருடன் உலவிக் கொண்டிருந்த மிச்சேலின் பெண் குழந்தையை வெளியே எடுத்தார். அங்கிருந்து தனது காரில் ஏறி, அதற்குள் உயிரிழந்துகிடந்த சிசுவுடன் அருகாமையில் இருக்கும் மருத்துவமனைக்கு விரைந்த டய்னல், தனது குழந்தை குறைப்பிரசவத்தில் பிறந்துவிட்டதாகவும் அதன் உயிரை காப்பாற்றும்படியும் டாக்டர்களிடம் கதறினார். அவரது உடல்வாகு மற்றும் நடத்தையில் சந்தேகப்பட்ட டாக்டர்கள், போலீசுக்கு தகவல் அளித்தனர். இதற்கிடையில், டய்னல் வீட்டின் பாதாள அறைக்குள் மயங்கிகிடந்த மிச்சேல் அடிவயிற்றில் தாங்க முடியாத வலியுடன் கண்விழித்தார். தன்னைச் சுற்றிலும் ரத்தவெள்ளமாக கிடப்பதையும், வயிற்றில் இருந்த சிசு, கருப்பையுடன் களவாடப்பட்டதையும் அறிந்து வேதனையால் துடித்தார்.

அங்கிருந்தபடியே போலீசாருக்கும், அவசர சிகிச்சை குழுவினருக்கும் தகவல் தெரிவித்தார். இதன்மூலம் டய்னல் லேனின் வக்கிரபுத்தி போலீசாருக்கு தெரியவந்தது. இதையடுத்து, அவரை கைதுசெய்த போலீசார் நடத்திய விசாரணையில் நீண்டகாலமாக குழந்தை பாக்கியம் இல்லாத டய்னல், வெளிநாட்டில் இருக்கும் தனது புதிய காதலனை ஏமாற்றுவதற்காக தான்கருவுற்றிருப்பதாக நாடகம் ஆடியுள்ளார் என்பது தெரியவந்தது.காதலன் வீட்டுக்கு வருவதற்குள் தனது கருவில் இருந்த சிசு, குறைப்பிரசவத்தில் இறந்துப்போனதாக காதலனை நம்பவைக்க கர்ப்பிணிப் பெண்களை ஈர்ப்பதற்காக இணையதளத்தில் பேறுகால பெண்களுக்கு தேவையான உடைகளையும், பிறக்கப்போகும் குழந்தைக்கும் புதிய ஆடைகளையும் தருவதாக போலி விளம்பரம் கொடுத்துள்ளார். அவரது சதிவலையில் சிக்கிய மிச்சேல் கருவில் இருந்த குழந்தையை பறிகொடுத்துவிட்டு, மயிரிழையில் உயிர் தப்பியுள்ளார் என்பதை போலீசார் கண்டுபிடித்தனர்.

இதையடுத்து, பவுல்டர் கவுண்ட்டி கோர்ட்டில் டய்னல்மீது சதி, மோசடி, சிசுக்கொலை உள்ளிட்ட பல்வேறு குற்றப்பிரிவுகளின்கீழ் போலீசார் வழக்கு தொடர்ந்தனர். இந்த வழக்கை விசாரித்த நீதிபதி, குற்றவாளி டய்னல் லேனுக்கு நூறாண்டு சிறை தண்டனை விதித்து நேற்று தீர்ப்பளித்துள்ளார். மிகவும் காட்டுமிராண்டித்தனமான இதுபோன்ற ஒரு செயலை யாரும் செய்வார்களா? என்று கற்பனையில்கூட நினைத்துப் பார்க்க முடியவில்லை என இந்த தீர்ப்பை விதித்த நீதிபதி மரியா பெர்கன்கோட்டர் குறிப்பிட்டுள்ளார்.