மலேசியாவைச்சேர்ந்த பெண்ணொருவர் தன்னை வவுனியாவை சேர்ந்த இளைஞரொருவர் மலேசியாவில் வைத்து ஏமாற்றியதாக தெரிவித்து ஊடகசந்திப்பொன்றை நடத்தியிருந்தார்.வவுனியா ஊர்மிளாக் கோட்டத்தில் அவர் தங்கியுள்ள வீடொன்றில் ஏற்பாடு செய்திருந்த இவ் ஊடக சந்திப்பில் வவுனியா பொலிஸார் அவ் இளைஞன் மீது நடவடிக்கை எடுக்க தவறி வருவதாகவும் சுட்டிக்காட்டினார்.மேலும் அவர் ஊடக சந்திப்பில் கருத்து தெரிவிக்கையில்,

நான் ஊடக சந்திப்பொன்றை நடத்த காரணம் வவுனியாவில் இருந்து அகதியாக மலேசியாவிற்கு வேலைதேடி வருகை தந்த இளைஞனொருவர் தான் மத போதகர் எனவும் தான் முன்பு விடுதலைப்புலிகளில் பணியாற்றியதாகவும் கூறி அறிமுகமாகியிருந்தார்.அந்த இளைஞன் என்னுடைய மலேசிய அலுவலகத்தில் பணியாற்றினார்.கடந்த வருடம் ஆறாம் மாதம் அறிமுகமாகியிருந்தார். அதுவும் எனது முதல் பிள்ளையின் நிகழ்வொன்றிலேயே இவர் அறிமுகமாகியிருந்தார்.அதன் பின்னர் என்னைப்பற்றிய முழு விபரங்களையுமும் அறிந்து என்னை காதலித்து என்னை திருமணம் செய்வதாக கூறியிருந்தார். அதன் பின்னர் உரிய முறையில் மலேசியாவில் அனுமதிபெற்று ஒரு வீட்டில் வசித்து வந்தோம். அந்தநிலையில் எனது வீட்டில் திருமணம் செய்யுமாறு கோரியபோதெல்லாம் தனது தங்கையின் திருமணம் ஏற்பாடாகியிருப்பதாகவும் அது முடிந்த பின்னர் திருமணம் செய்வதாகவும் கூறியிருந்தார். இதன்போது நான் கர்ப்பமாக இருப்பது தெரியவந்தது. எனவே கர்ப்பத்தை கலைக்குமாறு கோரியிருந்தார். ஆனால் நான் கலைக்க மறுப்பு தெரிவித்தேன்.

அவர் ஊழியம் செய்த போதகரிடம் தெரிவித்து அவர் கேட்டபொது இது தனது பிள்ளைதான் தான் திருமணம் செய்துகொள்வதாக தெரிவித்தார். தான் ஏமாற்ற மாட்டேன் எனவும் தெரிவித்தார். எனினும் என்னை மலேசியாவில் விட்டு சட்டவிரோதமாக இலங்கைக்கு அவர் வந்துவிட்டார்.எனவே நானும் இலங்கைக்கு அவரை தேடிவந்து அவருடைய வீட்டிற்கு சென்று கேட்டபொது அவருடைய அப்பா அம்மா என்னை கெட்டவார்த்தைகளால் பேசி அடித்தனர். அயலவர்கள் என்னை காப்பாற்றி தற்போது நான் இங்கு உள்ளேன். பின்னர் நான் பொலிஸ் நிலையம் சென்றிருந்தேன். இரண்டு நாட்கள் தலைமறைவாகியிருந்த என்னை ஏமாற்றிய லிஸ்லிராஜ்பொலிஸ் நிலையம் வந்திருந்தார். அங்கு தான் என்னை தீருமணம் செய்வதாக கூறி முறைப்பாட்டை வாபஸ் பெறவைத்தார். அதன் பின்னரும் அவர் தலைமறைவாகிவிட்டார். பின்னர் உதவி பொலிஸ் அத்தியட்சகரிடம் இந்த முறைப்பாட்டை கொண்டு சென்று நியாயம் கேட்டேன். அங்கு வந்த லிஸ்லிராஜ் தன்னுடைய பிள்ளைதான் திருமணம் செய்வதாக தெரிவித்து பதிவாளர் அலுவலகத்தில் என்னை நான்கு மணி நேரமாக காக்க வைத்திருந்து விட்டு சென்று விட்டான்.

பின்னர் பொலிஸில் வைத்து டி.ன்.ஏ பரிசொதனைக்கு உட்படுத்த வேண்டும் என அவர் தெரிவித்ததுடன் என்து கோரிக்கையை ஏற்று விசாரிக்க இந்த நாட்டில் சட்டமில்லை என பொலிஸாரும் கூறி வருகின்றனர்.எனவே எனது பிள்ளைக்கு சட்டரீதியாக தந்தை வேண்டும். ஆகவே லிஸ்லிராஜ் என்னை பதிவு திருமணம் செய்து கொள்ளவேண்டும். இலங்கை சட்டத்தில் திருத்தங்கள் கொண்டு வரப்படவேண்டும். அவ்வாறு திருத்தம் கொண்ட வரப்படாத வரையில் என்னைப்போன்ற பெண்கள் பாதிக்கப்படுவார்கள். என்னைப்போல் தைரியம் இல்லாத பெண்கள் தற்கொலை செய்வார்கள்.