11 வயது சிறுவன் ஒருவனை பயணப்பை ஒன்றுக்குள் ஒளித்துவை த்து கொண்டு செல்ல முயன்ற யுவதி ஒருவரை பிரேஸில் பொலிஸார் கைது செய்துள்ளனர். 23 வயதான நட்டாஷா விக்டோரியா சௌட்டோ எனும் யுவதியே இவ்வாறு கைது செய்யப்பட்டவராவார். இவர் பிரேஸிலின் ரியோ டி ஜெனெய்ரோ நகரிலிருந்து 550 மைல் தொலைவில் உள்ள தனது வீட்டுக்கு இச் சிறுவனை கொண்டு செல்ல முயன்றதாக பொலிஸாரிடம் தெரி வித்துள்ளார். நட்டாஷாவின் பயணப் பெட்டியில் சிறிய கால் ஒன்று வெளியே துருத்திக் கொண்டிருப்பதை அறிந்த அதிகாரிகள் சந்தேகமடைந்து அப் பயணப்பையை சோதனையிடத் தீர்மானித்தனர்.

அப் பயணப்பையின் ஸிப்பை திறந்தபோது அப் பைக்குள் சிறுவன் ஒருவன் இருப்பதைக் கண்டு அதிகாரிகள் அதிர்ச்சியடைந்தனர். இச் சிறுவன் அவனின் குடும்பத்தினரால் துன்புறுத்தப்படுவதால் தன்னை தத்தெடுக்குமாறு கெஞ்சியதாக பொலிஸாரிடம் நட்டாஷா தெரிவித்தார். எனினும்இ ஏன் அச் சிறுவனை பயணப்பைக்குள் வைத்து அழைத்துச் செல்ல நட்டாஷா முயன்றார் என்பது தெரியவில்லை. நட்டாஷாவை பிரேஸில் பொலிஸார் கைது செய்தனர். மேற்படி சிறுவன் தற்போது சிறுவர் பாதுகாப்பு இல்லமொன்றில் தங்க வைக்கப்பட்டுள்ளான். இது தொடர்பாக பொலிஸார் விசாரணை நடத்தி வருகின்றனர்.