கொரோனா வைரஸால் அதிகம் பாதிக்கப்படுவோரு, அதிகம் உயிரிழப்போரும் முதியோர்தான். எனவே, கொரோனா பாதுகாப்பு முன்னெச்சரிக்கை நடவடிக்கைகளிலும், தடுப்பூசி போடுவதிலும் முதியோருக்கு முக்கியத்துவம் அளித்து வருகிறது.

எனினும், உலகம் முழுவதும் வயது முதியோர் பலர் கொரோனாவை வெற்றிகரமாக வென்று காட்டியிருக்கின்றனர். அவ்வகையில், உலகின் இரண்டாவது மிக மூத்த நபராக கருதப்படும் பிரான்ஸ் நாட்டை சேர்ந்த சிஸ்டர் ஆண்ட்ரே கொரோனாவை வென்று காட்டியுள்ளார்.

இதுமட்டுமல்ல, கொரோனாவை வெற்றிகண்ட கையோடு நாளை (பிப்ரவரி 11) தனது 117ஆவது பிறந்தநாளை கொண்டாட ஆயத்தமாகிக்கொண்டு இருக்கிறார் சிஸ்டர் ஆண்ட்ரே. இவரது இயற்பெயர் லூசில் ராண்டன் என்பது குறிப்பிடத்தக்கது.

கொரோனா தொற்றால் பாதிக்கப்பட்ட பிறகும், தனக்கு கொரோனாவை கண்டு அச்சமில்லை என்றார் சிஸ்டர் ஆண்ட்ரே. அவர் செய்தியாளர்களிடம் பேசியபோது, “மரணத்தை தழுவ எனக்கு பயமில்லை. எனவே கொரோனாவை கண்டும் எனக்கு பயமில்லை” என்று தெரிவித்துள்ளார்.

சிஸ்டர் ஆண்ட்ரே 1904ஆம் ஆண்டு பிப்ரவரி 11ஆம் தேதியன்று பிறந்தார். இவர் ஐரோப்பாவின் மிக மூத்த நபர் என்பது குறிப்பிடத்தக்கது. அவர் நலமுடன் இருப்பதாகவும், மிக சாந்த குணமுள்ள ஆண்ட்ரே நாளை 117ஆவது பிறந்தநாளை கொண்டாட இருப்பதாகவும் அவரின் பணி ஓய்வு காப்பகம் தெரிவித்துள்ளது.