ஆட்டிசம் எனப்படும் சிறப்புத் தேவையுள்ளவர்கள் பற்றிய விழிப்புனர்வை தமிழர்களிடையே ஏற்படுத்தத் தென்னாசிய விழிப்புனர்வு சமூக சேவை நிலையம் தாரளமாகப் பங்களிப்புச் செய்துள்ளது என ஹரி ஆனந்தசங்கரி பாராளுமன்ற உறுப்பினர் தெரிவித்தார். இந்த நிகழ்வில் சேர்க்கப்படும் பணம் யாவும் இத்தகைய சிறார்களிற்கான பயிற்சி மற்றும் நடைமுறைச் சிகிச்சை சம்பந்தமான செலவுகிளிற்கு பயன்படுத்தப்படும்.

தென்னாசிய சமூகத்தினரிடையே மிகவும் பிரபல்யமான முதன்மை வகிக்கும் இந் நிகழ்வில் 1200 பேர் கலந்து கொண்டதுடன், பல அரசியல் பிரமுகர்களும் கலந்து கொண்டனர்.

குறிப்பாக கனடாவின் குடிவரவு மற்றும் குடியகல்வு அமைச்சர் கௌரவ ஜோன் மக்லம், ஒன்றாரியோ கண்சவேட்டிவ் கட்சியன் தலைவர் கௌரவ பற்றிக் பிறவுன், பாராளுமன்ற உறுப்பினர்கள் ஹரி ஆனந்தசங்கரி, மைக் லேக் ஆகியோர் கலந்து கொண்டனர்.

நிர்வாக இயக்குனர் திருமதி கீதா மூர்த்தியின் திறமையான முயற்சியே இந்த வெற்றிக்கான காரணம் என்பதைத் தெரிவித்த கௌரவ பற்றிக் பிறவுன் அவர்கள் தனது தலைமையிலான அரசு வெற்றி பெற்றதும் இந்த சிறப்புத் தேவையுள்ள சிறார்களின் வளர்ச்சிக்கான தேவைகளிற்காக மேலதிக நிதி ஒதுக்கீடுகளைச் செய்யும் என்பதைத் தெரிவித்தார்.

இந்த நிகழ்வில் ரொறன்ரோ பெரும்பாகத்தில் பணியாற்றும் தமிழ்ப் பொலிசார், மற்றும் இதர பாகங்களான யோர்க் பிராந்தியம் மற்றும் கால்ரன் பிராந்தியத்தில் பணியாற்றும் தமிழ்ப் பொலிசார் சார்பாக தமிழ் அதிகாரிகளும், குறிப்பாக ஹால்ரன் பிராந்தியப் துணைப் பொலிஸ் மா அதிபர் நிசாந்தன் துரையப்பா உள்ளிட்ட பலரும் கலந்து கொண்டிருந்தனர்.

இப் பிராந்தியங்களில் 55க்கும் மேற்பட்ட தமிழ்ப் பொலிசார் பணியாற்றி வருகின்றனர். அவர்கள் தமது சேவையினை ஒருங்கிணைந்த முகமாக தமிழ்ச் சமுகத்திற்கும் வழங்கத் திட்டமிட்டுள்ளனர். ரோறன்ரோ பெரும்பாகத்தின் பொலிஸ்மா அதிபர் திரு. மார்க் சாண்டர்ஸ் அவர்களும் இந்த விழாவில் ஒரு சிறப்பு விருந்தினராகக் கலந்து கொண்டு உரையாற்றியிருந்தார்.