ஐ.நா பொதுச்செயலர் இன்று யாழ்ப்பாணத்துக்கு வருகைதந்த நிலையில், காணாமற் போனோரின் உறவினர்கள், வலி.வடக்கிலிருந்து இடம்பெயர்ந்து நலன்புரி நிலையங்களில் வாழும் மக்கள் கவனயீர்ப்புப் போராட்டங்களில் ஈடுபட்டனர். யாழ்.செயலகத்திற்கு முன்பாகவும் யாழ். பொதுநூலகத்திற்கு முன்பாகவும் இந்தப் போராட்டங்கள் இடம்பெற்றன.

காணாமற் போனவர்கள் தொடர்பாக சர்வதேச விசாரணை நடத்தப்பட வேண்டும், தமக்கு நீதி வழங்கப்பட வேண்டும் என்றும், காணாமற்போனவர்களின் படங்களை ஏந்தியவாற அவர்களின் உறவினர்கள் போராட்டத்தில் ஈடுபட்டனர். அதேவேளை, வலி.வடக்கில் இராணுவத்தினர் வசமுள்ள மயிலிட்டி உட்பட்ட காணிகளில் மீள்குடியேற்றம் மேற்கொள்ளப்பட வேண்டுமெனத் தெரிவித்தும், இடம்பெயர்ந்த மக்கள் ஆர்ப்பாட்டத்தில் ஈடுபட்டனர்.

தமிழ்த் தேசியக் கூட்டமைப்பு மற்றும் வடக்கு மாகாண முதலமைச்சருடனான சந்திப்புகள் நடைபெற்ற யாழ். பொதுநூலகத்துக்கு வெளியிலும், கவனயீர்ப்புப் போராட்டங்கள் நடைபெற்றிருந்த போதிலும், ஐ .நா பொதுச்செயலர் அந்தப் பகுதிக்கு வந்து பாதிக்கப்பட்ட மக்களின் கருத்துக்களை செவி மடுக்கவில்லை. இதனால் போராட்டம் நடத்திய மக்கள் ஏமாற்றத்துடன் திரும்பிச் சென்றனர்.