யுத்தத்தால் பாதிக்கப்பட்டு வறுமைக்கோட்டுக்குட்பட்ட நிலையில் வாழும் குடும்பங்களின் வாழ்வாதாரத்தை மேம்படுத்தும் முகமாக கனடாவில் வாழ்ந்துவரும் புலம்பெயர் உறவொன்று முன்வந்துள்ளமைக்கு யாழ் மாவட்டத்தில் இயங்கிவரும் புதிய மாதர் கிராம அபிவிருத்தி சங்கம் நன்றி தெரிவித்துள்ளது. இவ்வாறு யுத்தத்தால் பாதிக்கப்பட்ட மக்களுக்கு கனடா ரொறன்ரோவில் வாழ்ந்துவரும் புலம்பெயர் உறவான அம்பிகா ஜூவல்ஸ் உரிமையாளரான திருமதி ஜெயசீலி இன்பநாயகம் நிதியுதவி வழங்கியுள்ளார்.

இதனடிப்படையில் பெண்களைத் தலைமைத்துவமாகக் கொண்ட குடும்பங்கள் யுத்தத்தின் போது பெற்றோரை இழந்த பிள்ளைகளின் மறுவாழ்வு விசேட தேவையுடையோருக்கான உதவித் திட்டங்கள் உள்ளிட்ட வறுமைக்கோட்டுக்குட்பட்ட நிலையில் வாழ்ந்து வரும் குடும்பங்களின் பொருளாதாரத்தை மேம்படுத்தும் முகமாக வாழ்வாதார உதவித் திட்டங்களுடன் மழையினால் பாதிக்கப்படும் குடும்பங்களின் சுகாதாரம் மற்றும்; தொற்றுநோய் பாதுகாப்பு உள்ளிட்ட உபகரணங்களையும் வழங்க முன்வந்துள்ளது.

முதற்கட்டமாக யாழ். மாவட்டத்தில் குறித்த உதவித் திட்டங்கள் முன்னெடுக்கப்பட்டு வரும் நிலையில் எதிர்காலத்தில் வடக்கின் ஏனைய மாவட்டங்களுக்கும் இவ்வாறான உதவிகள் விஸ்தரிக்கப்பட உள்ளதாகவும் புலம்பெயர் உறவான திருமதி ஜெயசீலி இன்பநாயகம் நம்பிக்கை தெரிவித்துள்ள நிலையில் இதனூடாக ஒருதொகுதி மக்கள் நன்மை பெறும் வாய்ப்பும் ஏற்பட்டுள்ளது.

இந்நிலையில் கனடாவில் வாழும் புலம்பெயர் உறவான திருமதி ஜெயசீலி இன்பநாயகம் அவர்களது உதவித்திட்டத்துக்கு நன்றி தெரிவித்துள்ள புதிய மாதர் கிராம அபிவிருத்தி சங்க நிர்வாகம் இதேபோன்றதான உதவித்திட்டங்களை வழங்கி யுத்தத்தால்; பாதிக்கப்பட்ட மக்களின் வாழ்வாதார பொருளாதார மேம்பாட்டுக்கு உதவ முன்வர வேண்டும் என்றும் ஏனைய புலம்பெயர் உறவுகளிடம் கோரிக்கையும் விடுத்துள்ளது.