படையினர் வசம் உள்ள தமது காணிகளை விடுவிக்கக் கோரி கேப்பாபிலவு விமானப்படைத்தளத்தின் முன்பாக இரவு பகலாக போராடி வரும் பிலக்குடியிருப்பு மக்களின் போராட்டத்திற்கு ஆதரவாக கொழும்பில் நேற்று ஆர்ப்பாட்டம் ஒன்று முன்னெடுக்கப்பட்டது. சமூக அமைப்புகள் மற்றும் அரசியல் பிரதிநிதிகள் இணைந்து கொழும்பு ரயில்நிலையத்திற்கு முன்பாக இவ் ஆர்ப்பாட்டத்தை முன்னெடுத்திருந்தனர்.

மக்களிடமிருந்து பறித்தெடுக்கப்பட்ட அவர்களது பூர்வீக காணிகளை அவர்களிடம் மீளக் கையளிக்குமாறு ஆர்ப்பாட்டக்காரர்கள் கோஷம் எழுப்பியதோடு பல்வேறு சுலோகங்கள் எழுதிய பதாதைகளையும் தாங்கியிருந்தனர். இவ் ஆர்ப்பாட்டத்தில் மத்திய மகாண சபையின் முன்னாள் உறுப்பினர் அசாத் சாலி, கலாநிதி விக்ரமபாகு கருணாரட்ன, இலங்கை ஆசிரியர் சங்கத்தின் செயலாளர் ஜோசப் ஸ்டாலின், ஜனநாயக மக்கள் காங்கிரஸின் பொதுச் செயலாளர் நல்லையா குமரகுருபரன் உள்ளிட்ட பல பிரதிநிதிகள் கலந்து கொண்டு கேப்பாப்பிலவு மக்களின் காணிகளை விடுவிக்குமாறு அரசாங்கத்திடம் கோரிக்கை விடுத்தனர்.