பாடசாலை மாணவர்களுக்கு ஏற்படும் வீதி விபத்துகளை தவிர்ப்பதற்கு வலி. மேற்கு பிரதேச சபை முன்மாதிரியான செயற்பாடு ஒன்றினை முன்னெடுத்துள்ளது. அதாவது, பாடசாலைக்கு அருகில் பிரதான வீதிகள் காணப்படுகின்றமையால் அந்த வீதியால் நடந்து செல்லும் மாணவர்கள் பாதுகாப்பாக செல்வதற்கு வீதியில் வைப்பதற்கு கம்பங்களையும் அதற்கான பட்டிகளையும் வலி. மேற்கு பிரதேச சபை வழங்கியுள்ளது.

வலி. மேற்கு பிரதேச சபையின் தவிசாளர் தர்மலிங்கம் நடனேந்திரன் அவர்களது எண்ணக்கருவிற்கு அமைவாக வலி. மேற்கில் பிரதான வீதியோரங்களில் உள்ள ஒன்பது பாடசாலைக்கு இவ்வாறு கம்பங்கள் கையளிக்கப்பட்டது.

பொலிஸாரின் வழிகாட்டுதல்களுக்கு அமைவாகவே இந்த செயற்திட்டம் மேற்கொள்ளப்பட்டது. தெரிவு செய்யப்பட்ட பாடசாலைக்கு கம்பங்கள் கையளிக்கும் இந்த நிகழ்வில் வலி. மேற்கு பிரதேச சபையின் தவிசாளர் தர்மலிங்கம் நடனேந்திரன், வலி. மேற்கு பிரதேச சபையின் உறுப்பினர்கள், வட்டுக்கோட்டை மற்றும் இளவாலை பொலிஸ் நிலைய போக்குவரத்து பிரிவு பொலிஸார், அதிபர்கள், ஆசிரியர்கள் மற்றும் மாணவர்கள் என பலரும் கலந்துகொண்டனர்.