கனடியத் தமிழர் பேரவை (CTC), சர்வதேச மருத்துவ சுகாதார நிறுவனம் (IMHO) கனடா மற்றும் இலங்கை அகதிகள் மறுவாழ்வுக் கழகம் (OfERR) ஆகிய அமைப்புகள் ஒன்றிணைந்து, 16ஆவது ஆண்டு தமிழ் கனடிய நடைப்பயணத்தை ஜூலை 29, 2026 அன்று உத்தியோகபூர்வமாகத் தொடங்கியுள்ளன. ஒற்றுமை, நம்பிக்கை மற்றும் உயரிய நோக்கத்தை மையமாகக் கொண்டுள்ள இப்பிரச்சாரம், ஒட்டுமொத்த சமூகத்தையும் ஒரு மனிதாபிமான இலக்கின் கீழ் திரட்டியுள்ளது. இந்த ஆண்டுக்கான நடைப்பயணம் வரும் செப்டம்பர் 13, 2026 ஞாயிற்றுக்கிழமையன்று, ஒன்ராறியோவின் பிக்கரிங் நகரில் உள்ள பிரெஞ்சுமேன்ஸ் பே, மில்லினியம் ஸ்கொயர் பூங்காவில் (Millennium Square Park, Frenchman’s Bay in Pickering, Ontario) நடைபெறவுள்ளது. இந்தியாவில் பல வருடங்களாக இடம்பெயர்ந்து வாழ்ந்து, தற்போது தாமாகவே முன்வந்து தங்களின் சொந்த ஊரான திருகோணமலைக்குத் திரும்பும் 30 தமிழ் குடும்பங்கள் மற்றும் தனிநபர்களின் மறுவாழ்வுக்கு ஆதரவளிப்பதே இந்த ஆண்டுக்கான முதன்மை நோக்கமாகும்.

நீண்ட கால இடப்பெயர்வுக்குப் பிறகு, தங்களின் பூர்வீக நிலமான திருகோணமலை மாவட்டத்தில் மீண்டும் வாழ்க்கையைத் தொடங்குவது என்பது குறைந்தளவிலான வளங்களைக் கொண்டு பூச்சியத்திலிருந்து ஆரம்பிப்பதாகும். இந்தத் திட்டம் அவர்கள் தாயகம் திரும்பியதற்கும், நீண்ட காலச் சுயசார்பு நிலையை அடைவதற்கும் இடைப்பட்ட கடினமான காலப்பகுதியைச் சீரமைக்க உதவும். இதற்காக அவர்களுக்குத் தற்காலிகப் பாதுகாப்பான வீட்டு வசதி, உலர் உணவுப் பொருட்கள் மற்றும் அன்றாட அத்தியாவசியத் தேவைகள் உடனடியாக வழங்கப்படும். ஒரு புதிய வாழ்க்கையைக் கட்டியெழுப்புவதற்கு உடனடி உதவிகள் மட்டும் போதாது என்பதை உணர்ந்து, இந்த நடைப்பயணத்தின் மூலம் திரட்டப்படும் நிதியானது குழந்தைகள் புதிய சமூகத்தோடும் கல்வி முறையோடும் இணைவதற்கும், பெரியவர்கள் தங்களின் வாழ்வாதார வாய்ப்புகளை உருவாக்கிப் பொருளாதார சுதந்திரத்தை மீட்டெடுப்பதற்கும் பயன்படுத்தப்படும். இதன் மூலம், தாயகம் திரும்பும் குடும்பங்கள் நம்பிக்கையுடனும் கண்ணியத்துடனும் தங்களின் எதிர்காலத்தைக் கட்டியெழுப்பத் தேவையான ஸ்திரத்தன்மை வழங்கப்படும்.

இந்தத் தொடக்க விழாவில் பேசிய தமிழ் கனடிய நடைப்பயணம் 2026இன் ஒருங்கிணைப்பாளர் ஷர்மிலா விக்னேஸ்வரானந்தன், இந்தியாவில் குடியுரிமை இல்லாமல் பல வருடங்களாக வாழும் தமிழ் குடும்பங்களின் சூழ்நிலையை விளக்கினார். இந்தியாவில் சுமார் 100,000 ஈழத் தமிழர்கள் அகதி முகாம்களிலும் வெளியேயும் பல சவால்களுடன் வாழ்ந்து வருவதாகவும், அவர்களில் பலர் தற்போது தங்களின் தாயகமான இலங்கைக்குத் திரும்பி கௌரவமான மற்றும் பாதுகாப்பான எதிர்காலத்தைக் கட்டியெழுப்ப விரும்புவதாகவும் குறிப்பிட்ட அவர், அதற்கு ஆதரவளிப்பதே இந்தத் திட்டத்தின் முதன்மை நோக்கம் என்றும் தெரிவித்தார்.

கனடியத் தமிழர் பேரவையின் தலைவர் ஸ்ரீதரன் துரைராஜா, கடந்த 15 ஆண்டுகளில் இந்தத் தமிழ் கனடிய நடைப்பயணம் ஏற்படுத்திய தாக்கம் மற்றும் சமூகத்தின் அர்ப்பணிப்பு குறித்துப் பேசினார். கடந்த 15 வருடங்களாக ஆயிரக்கணக்கான மக்கள் தங்களோடு இணைந்து நடந்துள்ளதாகவும், ஒவ்வொரு வருடமும் ஒரு முக்கிய நோக்கத்தை முன்வைத்து சமூகத்தின் ஆதரவைக் கோரியதன் மூலம் இதுவரை 1 மில்லியன் டாலருக்கும் அதிகமான நிதி திரட்டப்பட்டுள்ளதாகவும் பெருமிதத்துடன் தெரிவித்தார். மேலும், திரட்டப்பட்ட ஒவ்வொரு டாலரும் அர்த்தமுள்ள காரணங்களுக்காக மட்டுமே பயன்படுத்தப்பட்டுள்ளது என்பது ஒட்டுமொத்த சமூகமும் பெருமைப்படத்தக்க ஒன்று என்றும் அவர் குறிப்பிட்டார்.

சர்வதேச மருத்துவ சுகாதார நிறுவனத்தின் (IMHO) கனடா கிளையின் முன்னாள் தலைவர் டாக்டர் வரகுணன் மகாதேவன், இந்த மறுவாழ்வுத் திட்டம் தனது இதயத்திற்கு மிகவும் நெருக்கமான ஒன்று எனக் குறிப்பிட்டார். 2018ஆம் ஆண்டு யாழ்ப்பாணத்தில் தொடங்கப்பட்ட 'ஹோம் பாலியேட்டிவ் கேர்' (Home Palliative Care) திட்டத்தின் மூலம் CTC மற்றும் IMHO கனடா இடையே உருவான வெற்றிகரமான கூட்டாண்மையை அவர் நினைவு கூர்ந்தார். இத்தகைய மனிதாபிமானத் திட்டங்கள் மக்களின் உண்மையான தேவைகளை முழுமையாக ஆராய்ந்த பின்னரே தொடங்கப்பட வேண்டும் என்றும், இந்தத் திட்டம் வெளிப்படைத்தன்மை, பொறுப்புக்கூறல் மற்றும் முறையான திட்டமிடலுடன் நீண்ட கால தாக்கத்தை ஏற்படுத்தும் வகையில் செயல்படுத்தப்படும் என்றும் அவர் உறுதியளித்தார்.

OfERR சிலோன் அமைப்பின் தலைவர் திருமதி சின்னத்தம்பி சூரியகுமாரி விடுத்த வீடியோ செய்தியில், இடம்பெயர்ந்த மக்களின் மறுவாழ்வு மற்றும் மீள்குடியேற்றத்திற்காகத் தங்கள் அமைப்பு நீண்டகாலமாக ஆற்றிவரும் பணிகளைப் பகிர்ந்துகொண்டார். தாமாகவே முன்வந்து தாயகம் திரும்பும் மக்களின் பயணம் என்பது வாழ்க்கையை மீண்டும் முதலிலிருந்து ஆரம்பிப்பதாகும் என்றும், இந்த முயற்சி அவர்கள் தங்களின் அடையாளம், கண்ணியம், நம்பிக்கை மற்றும் தைரியத்தை மீண்டும் பெற்றுச் சுயமாக வாழ வழிவகுக்கும் என்றும் அவர் தெரிவித்தார். தங்களின் அமைப்பின் மூலம் இதுவரை ஆயிரக்கணக்கான மக்கள் தங்களின் சமூகத்தோடு மீண்டும் இணைந்து வாழ உதவி செய்துள்ளதாகவும் அவர் குறிப்பிட்டார்.

இந்த 16ஆவது ஆண்டு தமிழ் கனடிய நடைப்பயணம் என்பது வெறும் நடைப்பயணம் மட்டுமல்ல, இது தாயகம் திரும்பி வாழ்வை மீண்டும் கட்டியெழுப்பத் துணியும் குடும்பங்களுக்கு ஆதரவாக நிற்கும் ஒரு மனிதாபிமான முயற்சியாகும். நிறைவுரையாற்றிய 2026 நடைப்பயணத்தின் ஒருங்கிணைப்பாளர் கிஷன் பத்மநாதன், இப்பிரச்சாரத்தை நண்பர்கள், சக ஊழியர்கள், அண்டை வீட்டார்கள் மற்றும் சமூக அமைப்புகளுடன் பகிர்ந்து கொள்ளுமாறு கேட்டுக்கொண்டார். செய்தியைப் பரப்புவதன் மூலமோ, நடைப்பயணத்தில் பங்கேற்பதன் மூலமோ, சுயாதீனமாக நிதி திரட்டுவதன் மூலமோ அல்லது நிதி திரட்டும் குழுக்களை உருவாக்குவதன் மூலமோ அனைவரும் இதில் பங்களிக்க முடியும் என்றார். இதற்கான நன்கொடைகளை tamilcanadianwalk.ca என்ற இணையதளத்தின் மூலம் வழங்கலாம் என்றும், நீங்கள் அளிக்கும் ஒவ்வொரு பங்களிப்பும் இக்குடும்பங்களின் இடைக்கால மாற்றத்தை எளிதாக்கி அவர்களைச் சுயசார்புடையவர்களாக மாற்ற உதவும் என்றும் அவர் தெரிவித்தார்.

இப்பிரச்சாரம் தொடங்கும் இவ்வேளையில், கனடியத் தமிழர் பேரவை, IMHO கனடா மற்றும் OfERR சிலோன் ஆகிய அமைப்புகள், கனடா முழுவதிலும் அதற்கு அப்பாலும் உள்ள அனைத்து மக்களையும் நோக்கம் மற்றும் இரக்க குணத்தோடு ஒன்றிணையுமாறு அன்புடன் அழைக்கின்றன. நாம் எடுத்து வைக்கும் ஒவ்வொரு அடியும், திரட்டும் ஒவ்வொரு டாலரும், இக்குடும்பங்கள் அதிக ஸ்திரத்தன்மை, நம்பிக்கை மற்றும் நல்வாய்ப்புகளுடன் தங்களின் வாழ்க்கையை மீண்டும் கட்டியெழுப்ப உதவும்.

ஒன்றாய் நடப்போம். நோக்கத்தோடு நடப்போம். நம்பிக்கையோடு நடப்போம்.