சிலந்தியின் விடா முயற்சியைப் பார்த்து, இங்கிலாந்துடன் போர் புரிந்து 14ம் நுாற்றாண்டில், ஸ்காட்லாந்துக்கு சுந்திரம் வாங்கிய மன்னன் ராபர்ட் புரூசின் கதை உலகறிந்தது. அண்மையில், அவரது மண்டையோட்டின் மாதிரியை வைத்து அவரது அசல் தோற்றத்தை உருவாக்கி வியக்கவைத்திருக்கின்றனர் வல்லுனர்கள். போன நுாற்றாண்டிலேயே, கல்லறையிலிருந்து அவரது மண்டையோட்டை எடுத்து, சில மாதிரிகளை அச்சாக உருவாக்கி வைத்திருந்தனர் அருங்காட்சியகத்தினர். அதை அப்படியே முப்பரிமாண முறையில் ஸ்கேன் செய்தது, பிரிட்டனிலுள்ள லிவர்பூல் பல்கலைக்கழகத்தின் வரைகலை மற்றும் உயிரியல் வல்லுனர்களைக் கொண்ட, 'பேஸ்லேப்' என்ற அமைப்பு.

பின்னர் ராபர்ட் புரூசின் உருவம் எப்படி இருந்திருக்கும் என்று கணித்து, தோலின் நிறம், கண்கள், மூக்கு, தாடை, வாய், தலை முடி, தாடி போன்றவற்றை ஊகித்து ஒரு உருவத்தை சிலையாக வடித்துள்ளனர். பார்ப்பதற்கு அசல் அந்தக்கால ஸ்காட்லாந்து மன்னரைப் போலவே இருப்பதாக ஸ்காட்லாந்து மக்கள் மெச்சுகின்றனர்.